Sujet 2022

Verborge i de tüüfste Tüüfe vo Meierschappel, am Grund vom Zugersee, läbed scho set vellne Jahr mystischi und unghüüri Gschöpf. Gseh hed sie i dere lange Ziit aber niemert. Nur glegentlich hend sie ihri Gstalt aneme Fischer oder einsame Schwimmer offebart. Ihri Erschinig isch aber immer so mysteriös gsi, dass sich niemert sicher gsi isch, was er tatsächlich gseh hed. So isch es cho, dass ihr vellicht au scho die einti oder anderi Sage vo de Seemonschter vom Chieme ghört hed.
Wo s aber vo einiger Ziit ruhiger i de Umgebig worde isch, hend sich die mystische Gschöpf s erste Mal langsam us de Tüüfe vom Zugersee gwagt. Scho nach churzer Ziit hend sie sich ganz as Ufer vum Chieme und no vell wiiter gwagt. So hend sie agfange ihre Tumult unter de Mensche z triibe und  hend i de Umgebig für Angst und Schrecke gsorgt. Debii hed niemert gwüsst, wie mer die usser Rand und Band gratene Seemonschter wider chönnti unter Kontrolle becho. Erst s Uftauche vonere Unbekannte gottesähnliche Gstalt hed dem Schrecke langsam möge es Endi setze. Mit sim imposante Drüzack isch es dem mächtige Chrieger schliesslich glunge, die wüetende Seemonschter unter Kontrolle z becho. Als Aführer hed er sie schliesslich wieder chönne zrugg id Tüüfe vo Meierschappel füehre und hed somit d Umgebig vo dere Plag erlöst.
Dur d Hilf vo dem gottesähnliche Chrieger cha d Bevölkerig wieder ohni Angst vo de mystische Seemonschter lebe. Nur einisch im Jahr tauched sie unter de Füehrig vo ihrem göttliche Afüehrer wieder ade Oberflächi uf. Denn triiebed sie wieder ihre Schabernack. Sie fiired, mached Musig, tanzed, singed und trinked bis i die früehe Morgestunde. So schnell wie de Spuck jewiils afangt isch er aber au wieder verbii. Langsam zieht sich denn die fiirendi Meuti wieder zrugg id Tüüfi und erholt sich vo de Strapaze. 
​
Deep-Rising, Schrecken der Tiefe

Probeweekend Hospental, 18./19.12.2021

The Crow - Schwarzenberg, 20.11.2021

---